Хятадын өмнөд хэсгийн технологийн төв болох Шинжин хотод замын хөдөлгөөнийг зохицуулдаг робот цагдаа нар аль хэдийн энгийн үзэгдэл болоод байна. Тэднийг уулзварууд дээр оргил ачааллын үеэр гараа өргөн, замын хөдөлгөөнийг чиглүүлж байгааг харж болно. Харин тэднийг ажиллуулдаг хиймэл оюун ухааны технологи улам ухаалаг, нарийвчлалтай болж байгаа тул боломжууд нь ч мөн сайжирч байна.
Саяхны нэг жишээнд робот цагдаа мотоциклийн жолооч хамгаалалтын малгай өмсөөгүй байгааг анзаарч, дуу хоолойгоор анхааруулга өгсөн байна. Үүний дараа жолооч үнэхээр малгайгаа өмссөн байна.
Жолооч нар үүнийг хэрхэн хүлээж авч байна вэ?
“Жаахан эвгүй санагдаж магадгүй ч хяналтыг сайжруулна. Шинэлэг санагдаж байна. Хэрвээ жинхэнэ хүн байсан бол торгууль тавих байх гэж эхлээд бодогдоно. Харин робот бол зүгээр л заавар дамжуулж байгаа мэт мэдрэмж төрүүлдэг” гэж тэд хэлжээ.
Шинжин хотын Замын цагдаагийн газрын мэдээлснээр эдгээр робот цагдаа нарын хэрэглээг энэ онд шат дараатайгаар өргөжүүлж, согтуугаар жолоо барих шалгалт хийх, ослын газрын нөхцөл байдлыг зохицуулах, хууль зөрчсөн үйлдлийг ухаалгаар илрүүлэх, нотлох баримтыг автоматаар цуглуулах зэрэгт ашиглахаар төлөвлөж байна гэжээ.
Эх сурвалж: CCTV
