Хятадын хүн дүрст робот үйлдвэрлэгч UBTECH Европын нисэх онгоц үйлдвэрлэгч Airbus компанитай хамтран ажиллах гэрээ байгуулж, үйлдвэрлэлийн шугамд ашиглах робот нийлүүлэхээр боллоо.
Airbus нь UBTECH-ийн Walker S2 загварын хүн дүрст роботыг худалдан авч, нисэхийн үйлдвэрлэлд робот ашиглах туршилт, автоматжуулалтыг хамтран хэрэгжүүлэх юм.
Энэ хамтын ажиллагаа нь UBTECH-ийн гадаад зах зээлд тэлэх стратегийн нэг хэсэг бөгөөд тус компани өмнө нь АНУ-ын Texas Instruments-тай ижил төстэй түншлэл байгуулж байсан туршлагатай билээ.
Тус компани 2025 онд нийт 1.4 тэрбум юанийн (ойролцоогоор 200 сая ам.доллар) захиалга авч, 2026 онд үйлдвэрлэлийн хүчин чадлаа 10,000 буюу түүнээс дээш робот үйлдвэрлэхээр төлөвлөжээ.
Walker S2 хүн дүрст робот нь 1.76м өндөр, батарейгаа өөрөө солих чадвартай бөгөөд 2025 оны 11 дүгээр сараас эхлэн масс үйлдвэрлэлд орсон загвар юм.
Робот үйлдвэрлэлийн салбарын тайланд 2025 онд Хятадын роботын компаниуд хүн дүрст роботын дэлхийн хамгийн том үйлдвэрлэгчид болсныг онцолсон байна. Шанхайд төвтэй AgiBot зах зээлийн 39 хувийг дангаар эзэлж тэргүүлсэн бол Unitree болон UBTECH нар удаалжээ.
Эх сурвалж: Xinhua
