Ирак улсын хөлбөмбөгийн шигшээ баг Мексикийн Монтеррей хотод болсон тоглолтонд Боливийг 2:1-ээр ялж, 2026 оны ФИФА-гийн Дэлхийн аварга шалгаруулалтын сүүлчийн 48 дахь эрхийг авлаа.
Тоглолтын 10 дахь минутад Али Аль-Хамади мөргөж гоол оруулан Иракт давуу байдал авчирсан ч Боливийн Мойсес Паниагуа 38 дахь минутад тэнцүүлжээ. Хоёрдугаар хагаст Аймен Хусейн 53 дахь минутад шийдвэрлэх гоолыг оруулснаар “Месопотамийн арслангууд” ялалт байгуулав.
Ирак улс өмнө нь 1986 онд анх удаагаа Мексикийн Дэлхийн аваргад оролцож байсан түүхтэй бөгөөд энэхүү ялалт нь тэр цагаас хойших 40 жилийн хүлээлтийг дуусгаж үндэстний хэмжээний баяр ёслол болж байна.
Иракын баг хөрш зэргэлдээ улсуудад нь дайн тулаан үргэлжилж буй энэ үед ялалт байгуулсандаа онцгой ач холбогдол өгч байна. Ираны пуужингийн дайралтаас болж агаарын зай хаагдсан тул тамирчид нь Иорданоор дамжин урт замыг туулж Мексикт хүрсэн бол дасгалжуулагч Грэм Арнолд мөн дайны улмаас Дубайд саатаж тэдний араас очиж багтайгаа нэгдсэн байна.
Австрали дасгалжуулагч Арнолд “бид 46 сая хүнийг баярлуулсандаа маш их баяртай байна” гэж тоглолтын дараа мэдэгдэл хийжээ.
Ирак хэсгийн шатанд Франц, Норвеги, Сенегалтай нэг хэсэгт хүч үзэх ба 2026 оны 6 дугаар сарын 16-нд эхний тоглолтоо Норвегийн эсрэг хийхээр боллоо.
Эх сурвалж: Al Jazeera, ESPN
ДэлхийнАварга2026 #ФИФА #Ирак #Хөлбөмбөг #WorldCup2026 #Iraq
