ОХУ-ын Зэвсэгт хүчний Жанжин штабын Тагнуулын ерөнхий газар (ГРУ)-ын нэгдүгээр орлогч дарга Түрүүч генерал Владимир Алексеев Москва хотын баруун хойд хэсэгт орших орон сууцныхаа гадаа буудуулж, хүнд шархадсан байна.
Оросын мөрдөн байцаах хорооноос мэдээлснээр, үл мэдэгдэх этгээд генерал Алексеевыг гэр рүүгээ орж байхад нь хэд хэдэн удаа буудсан байна. Зарим эх сурвалжийн мэдээлснээр халдагч этгээд хүргэлтийн ажилтны хувцас өмссөн байсан бөгөөд генералыг эхлээд хөл, гар руу нь буудаж, улмаар цээжин тус газар нь шархдуулжээ.
Генерал яаралтай эмнэлэгт хүргэгдсэн бөгөөд мэс засалд орж, биеийн байдал нь хүнд комын байдалтай байгаа аж.
Хэрэг гарснаас хойш хоёр хоногийн дараа буюу 2 дугаар сарын 8-нд Оросын Холбооны аюулгүй байдлын алба (ФСБ) халдлага үйлдсэн гэх сэжигтэн Любомир Корбаг Дубай хотоос баривчлан Орост авчирснаа мэдэгдэв.
Энэхүү халдлага нь Орос, Украин болон АНУ-ын төлөөлөгчид Абу Даби хотод энхийн хэлэлцээ хийж дууссаны маргааш болсноороо онцлог юм.
ОХУ-ын Гадаад хэргийн сайд Сергей Лавров үүнийг “Украины зүгээс зохион байгуулсан террорист ажиллагаа” гэж нэрлээд, энхийн хэлэлцээг тасалдуулах зорилготой гэж буруутгав.
Украины Гадаад хэргийн сайд Андрий Сибиха энэ хэрэгт Украины тал оролцоогүй бөгөөд “Оросын дотоод зөрчил байх магадлалтай” хэмээн мэдэгджээ.
Владимир Алексеев гэж хэн бэ?
Тэрээр 2011 оноос хойш ГРУ-гийн дэд даргаар ажиллаж буй, Оросын цэргийн тагнуулын салбарын хамгийн нөлөө бүхий эрхмүүдийн нэг бөгөөд 2023 онд Евгений Пригожиний эхлүүлсэн зэвсэгт бослогын үеэр түүнтэй хэлэлцээр хийж байсан видео бичлэгээрээ олон улсад танигдсан.
Тэрээр Сири дэх цэргийн ажиллагаа болон 2022 онд Украиныг довтлох ажиллагааны тагнуулын мэдээллийг хариуцаж байсан туршлагатай.
Мөн тэрээр АНУ-ын 2020 оны сонгуульд хөндлөнгөөс оролцсон болон 2018 онд Британийн Солсберид болсон “Новичок” хорт бодисын халдлагыг зохион байгуулсан хэргээр барууны орнуудын хоригт орсон хүн юм.
Эх сурвалж: CNN
