Израйл Ливанд “Мөнхийн харанхуй” нэртэй ажиллагаа явуулж, 254 хүн амь үрэгдлээ.
АНУ, Иран улсууд харилцан 14 хоногийн хугацаанд гал зогсоох хэлэлцээр байгуулснаас хойш хэдхэн цагийн дараа буюу 2026 оны 4 дүгээр сарын 09-ний өдөр Израйл Ливанд хамгийн том агаарын цохилтоо өгч, гал зогсоох асуудлыг улам бүр хямралд орууллаа.
“Мөнхийн харанхуй” нэртэй ажиллагааны хүрээнд Израйлын 50 сөнөөгч онгоц арав хүрэхгүй минутад 100 гаруй байрлалд 160 орчим пуужин харвасан бөгөөд Ливаны иргэний хамгааллын алба дор хаяж 254 хүн амь үрэгдэж, 1,165 хүн шархадсан аймшигт хэрэг гэж мэдэгдэв.
Израйлын зүгээс Бейрутын төв хэсэгт урьдчилан анхааруулга өгөлгүй дайрсан бөгөөд өмнөд Бейрут, Сидон, зүүн Бекаа хөндий, Тир хот зэрэг газар цохилт хүрчээ. Нийслэлийн эмнэлгүүд гэмтэгсдээр дүүрч амиа алдагсдын тоо өссөөр байна.
Ираны зүгээс Ливан мөн гал зогсох ёстой байсан энэ нь АНУ-тай байгуулсан хэлэлцээрийн “салшгүй нэг нөхцөл” гэдгийг онцолж, цаашид байдал үргэлжилбэл Хормузын хоолойг дахин хаана гэж анхааруулав.
Израйл Ливан улсуудын олон жилийн дайсагнасан харилцааг сийрүүлбэл Израйл улс 1948 онд байгуулагдахдаа Палестины газар нутгийг эзэлсэн нь Арабын ертөнцийн эсэргүүцлийг төрүүлж, Ливанд дүрвэгсдийн асуудал, зэвсэгт бүлэглэлүүд бий болоход хүргэсэн. Улмаар Израйлын Ливан руу 1978, 1982 онд хийсэн цэргийн довтолгоонууд нь Хезболла бүлэглэлийг төрүүлж, тэрхүү бүлэглэл өнөөг хүртэл Ираны дэмжлэгтэйгээр Израйлтай байнгын мөргөлдөөн үүсгэсээр байгаа юм.
Эх сурвалж: Al Jazeera, CBC News, Times of Israel
#Израйл #Ливан #Хезболла #Бейрут #ГалЗогсоол #Israel #Lebanon #Hezbollah #MiddleEast #shortlymn
