Хятадын ерөнхийлөгч Ши Жин Пин өнөөдөр Тайваны гол сөрөг хүч болох Гоминьдан намын дарга Чэн Ли-Вунтай уулзаж, Тайваны асуудлаар энх тайвныг эрхэмлэсэн байр сууриа илэрхийлэв.
Энэхүү түүхэн уулзалт нь сүүлийн арав гаруй жилд тохиосон анхны уулзалт байлаа. Уулзалтыг Хятадын удирдагчид уламжлалт байдлаар өндөр зэрэглэлийн зочдоо хүлээж авдаг Ардын их танхимд зохион байгуулж, талууд Тайваны хоолойн эргэн тойронд энх тайван байдлыг хадгалах шаардлагатай гэдгийг онцолж харилцан санал солилцов.
Ши Жин Пин уулзалтын эхэнд “хоёр талын хүмүүс хоёулаа Хятад үндэстэн бөгөөд бидэнд энх тайван, хөгжил, харилцаа холбоо, хамтын ажиллагаа хэрэгтэй. Энэ бол нийтлэг хүсэл мөрөөдөл” гэдгийг онцлон тэмдэглэжээ.
Тэрээр мөн “Тайваны тусгаар тогтнол бол Тайваны хоолойн энх тайвыг сүйтгэгч гол хүчин зүйл бөгөөд бид үүнийг хэзээ ч хүлээн зөвшөөрөхгүй” гэж мэдэгдэв.
Чэн Ли-Вун уулзалтын дараа хэвлэлийн бага хурал хийж, “Тайваны хоолой нь гэр бүлийн холбоо, соёл иргэншил, найдлагыг холбосон хоёр талын Хятад хүмүүсийн хамтарч хамгаалах энх тайвны бэлгэдэл болох ёстой” хэмээн мэдэгдсэн байна.
Тайваны сөрөг хүчний удирдагчийн айлчлал 2026 оны 4 дүгээр сарын 07-ны өдрөөс эхэлж, Шанхай, Нанжинд зочилсны дараа Бээжин хүрэлцэн ирсэн бөгөөд уулзалт нь 2026 оны 5 дугаар сард болох Ши Жин Пин, Дональд Трамп нарын дээд хэмжээний уулзалтын өмнөхөн зохиогдсон нь олон улсын анхаарлыг татлаа.
Тайваныг засаглаж буй намын Ерөнхийлөгч Лай Чин-Тэ батлан хамгаалах тусгай төсвийг нэмэгдүүлж 40 тэрбум долларт хүргэх төсвийг хэлэлцүүлэх гэж байгаа боловч Гоминьдан нам их хурлаар хэлэлцүүлэхийг эсэргүүцэн, саатуулсаар байгаа билээ.
БНХАУ, Тайван улсын хоорондын харилцаа, Нэг Хятад бодлого, Тайваны хоолойн тогтвортой байдал дэлхийн улс төрийн тавцанд улам бүр сонирхол татсаар байна.
Эх сурвалж: Al Jazeera, NPR, AP, South China Morning Post
#Тайвань #ХятадТайвань #ШиЖинПин #Гоминьдан #TaiwanChina #CrossStraitRelations #XiJinping #KMT
