Ойрх Дорнод дахь цэргийн ажиллагаанаас үүссэн хурцадмал байдал дэлхийн агаарын тээврийн салбарт томоохон доргилт үүсгээд байна. Тус бүс нутгийн агаарын орон зай хэсэгчлэн хаагдаж, зарим улсын нисэх буудлууд халдлагад өртөж, аюулгүй байдлын эрсдэл нэмэгдсэнтэй холбоотойгоор дэлхийн томоохон авиа компаниуд нислэгээ цуцалж, чиглэлээ өөрчилж эхэллээ.
Үүний улмаас 4,000 гаруй олон улсын нислэг саатаж, хэдэн зуун мянган зорчигч Дубай, Доха, Абу Даби болон Европ, Азийн дамжин өнгөрөх нисэх буудлуудад гацаад байна. Олон улсын агаарын тээвэрлэгчид болох Emirates, Etihad Airways, Qatar Airways, Air India, British Airways, Lufthansa, Air France-KLM, Wizz Air зэрэг компаниуд зарим чиглэлээ бүрэн зогсоож, заримыг нь хязгаарлалтай байдлаар гүйцэтгэж байгаа аж. Албан ёсны нэгдсэн тоо хараахан гараагүй ч шинжээчдийн тооцоогоор 100 мянгаас дээш зорчигч саатсан байх магадлалтай гэж үзэж байна.
Цэргийн үйл ажиллагааны нөлөө зөвхөн зорчигчдод бус, агаарын тээврийн салбарын санхүүд ч хүчтэй цохилт өгч байна. Агаарын тээврийн компаниудын зах зээлийн үнэлгээ ойролцоогоор 22 тэрбум ам.доллараар буурсан бол нислэг цуцлалт, нөхөн олговор, урт маршрут, түлшний үнэ өсөлт, дайны эрсдэлийн даатгал нэмэгдсэнтэй холбоотойгоор шууд болон шууд бус хохирол 1 тэрбум ам.доллароос давсан байна. Олон улсын нөхцөл байдал энэ хэвээр байвал нефтийн үнэ өсөж үйл ажиллагааны зардал нэмэгдэж, зарим чиглэлд зардал 20–25 хувиар өсөх эрсдэлтэй болжээ.
Энэхүү нөхцөл байдал нь COVID-19 цар тахлын дараах хамгийн том нисэхийн салбарын сорилт болж магадгүй гэж шинжээчид дүгнэж байна. Хэрэв Ойрх Дорнодод байдал намжихгүй цааш үргэлжилбэл нислэгийн үнэ өсөх, логистик болон карго тээвэрт саатал үүсэх, аялал жуулчлалын салбарт дарамт нэмэгдэх төлөвтэй байна.
Эх сурвалж: Reuters, The Guardian, Financial Times
