Японы улс төрийн “төмөр хатагтай” гэгдэх Санаэ Такаичи ердөө гурван сарын өмнө тамгаа гардан авахдаа дэлхий нийтийг гайхшируулж байлаа. Гэвч түүний жинхэнэ “нүүдэл” нь энэ 2 дугаар сарын хүйтэн өдөр тохиов. Тэрээр өөрийн засаглалдаа итгэлтэй байгаагаа батлахын тулд парламентаа тарааж, бүхнийг дэнчин тавин ээлжит бус сонгууль зарласан юм. Жинхэнэ лидер хүн ийм зоримог үйлдэл хийдгийг дэлхий дахинд тунхаглав.
Такаичигийн “Санаэномикс”
Сонгуулийн хэсгүүд хаагдаж, урьдчилсан дүн гарахад Токиогийн гудамжнууд тэр чигтээ шуугьж эхлэв. Такаичигийн тэргүүлсэн эвсэл 465 суудлын 300 гаруйг нь халаасалж, үнэмлэхүй ялалт байгуулах нь тодорхой боллоо.
Түүний ялалтын нууц нь ердөө л “Санаэномикс” хэмээх зоримог төлөвлөгөө байв. Тэрээр:
- Японы айл өрх бүрийн нуруун дээрх хүнсний татварыг тэглэнэ гэж амласан.
- Залуу үеийнхний зүрх сэтгэлийг сошиал медиагийн нээлттэй байдлаараа татсан.
- “Хүчтэй Япон”-ыг эргүүлэн авчирна гэх үндсэрхэг атлаа итгэл төрүүлэхүйц амлалт өгсөн.
- Дэлхийн тавцан дахь “Шинэ Япон”-ыг цогцлооно гэж амласан.
Энэ ялалт зөвхөн Японы дотоод хэрэг биш юм. Цагаан ордноос Дональд Трамп түүнд баяр хүргэж, “Ухаалаг, хүчирхэг удирдагч” хэмээн тодотгосон нь Такаичиг олон улсын геополитикийн гол тоглогч болсныг дахин батлав. Хятадтай харилцах хатуу байр суурь, цэргийн хүчээ зузаатгах эрмэлзэл нь Ази, Номхон далайн бүс нутгийн “шатрын хөлөг” дээрх нүүдлийг өөрчлөх нь гарцаагүй.
“Энэ бол зөвхөн миний ялалт биш, Японы ард түмний зоригтой сонголт, ялалт байлаа” хэмээн тэрээр ялалтын баяраа тэмдэглэн хэлэв.
Одоо түүнд баярлах хугацаа бага байна. Амласан их хэмжээний халамж, татварын хөнгөлөлт нь улсын төсөвт ямар ачаалал өгөх вэ? Иений ханш хэрхэн савлах вэ? Японы анхны эмэгтэй Ерөнхий сайд мөрийгөө яллаа, харин одоо бодит байдалтай нүүр тулах цаг ирлээ.
Эх сурвалж: CNN
