Мексикийн Жалиско мужийн Лагос-де-Морено хотод 2026 оны 6-р сарын 13-наас хойш киноноос гарч ирсэн мэт хачирхалтай хэрэг цувралаар гарч, дэлхийн хэвлэлүүдийн анхаарлыг татаж байна.
Өнгөрсөн хоёр долоо хоногийн хугацаанд дор хаяж таван хүн мотоцикл хулгайлсан гэх сэжгээр гэрлийн шонгоос скочоор хүлэгдсэн байдалтай олджээ. Тэдний хажууд хулгайлагдсан гэж үзсэн мотоциклыг үлдээж, духан дээр нь испаниар “ratero” (хулгайч) гэж бичсэн байсан бөгөөд заримынх нь нүүрэн дээр муурын сахал хүртэл зурсан байжээ.
Энэ бүх үйлдлийг хийсэн этгээд өөрийгөө ил гаргаагүй ч сошиал сүлжээнд “Лагос-де-Мореногийн Бэтмен” хэмээн алдаршаад байна. Зарим оршин суугчид түүнийг гэмт хэрэгтэй тэмцэж байна хэмээн дэмжиж байгаа бол нөгөө хэсэг нь хууль бус хүчирхийллийг зөвтгөж болохгүй гэж үзэж байна.
Жалиско мужийн Аюулгүй байдлын нарийн бичгийн дарга Хуан Пабло Эрнандесын мэдээлснээр, шонгоос хүлэгдсэн хүмүүсийг хууль ёсны хувьд хохирогч гэж үзэн мөрдөн шалгаж байгаа бөгөөд тэд үнэхээр хулгай хийсэн эсэх нь одоогоор нотлогдоогүй байна. Цагдаа нар хэрэгт холбоотой байж болзошгүй хоёр автомашиныг тогтоосон ч “Бэтмен”-ийг одоогоор баривчлаагүй байна.
Энэхүү хэрэг нь Мексикийн гэмт хэрэг өндөртэй бүс нутагт иргэд хуульд бус өөрсдийн аргаар “шударга ёс тогтоох” оролдлого нэмэгдэж буйг дахин харууллаа. Харин Мексикийн хууль тогтоомжийн дагуу өөрийн дураар шийтгэл оногдуулах нь өөрөө эрүүгийн гэмт хэрэг тул “Бэтмен” хочит этгээдийг эрх баригчид идэвхтэй эрэн сурвалжилж байна.
📰 Эх сурвалж: AsiaOne, El País, New York Post
