АНУ-ын ихэнх нутгаар 1 дүгээр сарын 23-26-ны өдрүүдэд хүчтэй цасан шуурга үргэлжилж, их хэмжээний цас, мөсөн бороо орж, хүйтний эрч чангарч авто зам, нислэг, эрчим хүчний хангамжид ноцтой хүндрэл учруулж байна. Нутгийн төвөөс зүүн хойд бүс нутгийг хамарсан шуурганы нөлөөгөөр олон мужид авто зам хаагдаж, мянга мянган нислэг цуцлагдах эсвэл хойшлогдох, мөстөлтөөс шалтгаалан цахилгаан тасалдах эрсдэл нэмэгджээ. Цаг уурын албаны мэдээлснээр зарим бүс нутагт 30см-ээс их цас орох магадлалтай бөгөөд халтиргаа гулгаа ихсэх, цахилгааны шонгууд унах, цахилгаан дамжуулах шугам гэмтэх аюултай хэвээр байна. Албаныхан иргэдийг шаардлагагүй бол замд гарахгүй байх, онцгой байдлын сэрэмжлүүлгийг дагаж мөрдөхийг анхааруулж байна.
Эх сурвалж: CNN
