Өнөөдөр буюу 2026 оны 1-р сарын 25-ны өглөө АНУ-ын экстрим тамирчин Алекс Хоннолд Тайванийн нийслэл Тайпэй хотын бэлгэ тэмдэг болсон “Taipei 101” цамхагт ганцаарчилсан чөлөөт авиралт “free solo” аргаар амжилттай гарлаа.
Тэрээр “Taipei 101” цамхгийг ямар ч олс, хамгаалалтын хэрэгсэлгүйгээр авирч, дэлхий нийтийг гайхширууллаа.
Уг цамхаг нь 508 метр өндөр, 101 давхар ба уг барилгын гадна ханыг тэрээр зөвхөн өөрийн гар, хөл, биеийн хүч болон төвлөрөлдөө найдан туулсан бөгөөд авиралтыг Netflix-ийн тусгай шууд дамжуулалтаар олон сая хүн зэрэг үзлээ. Өчүүхэн алдаа гаргасан тохиолдолд амь насанд нь ноцтой аюул учрах байсан уг авиралт нь мэргэжилтнүүдийн зүгээс хүний боломжийн дээд хязгаарыг шалгасан үйл явдал хэмээн өндөр үнэлэгдэж байна.
Алекс Хоннолд өмнө нь АНУ-ын Йосемитийн үндэсний цэцэрлэгт хүрээлэнгийн El Capitan хадан хясааг мөн “free solo” аргаар давж, дэлхийд нэрээ мөнхөлсөн хүн юм. Харин энэ удаагийн “Taipei 101”-ийн авиралт нь хиймэл байгууламж дээр хийсэн хамгийн аюултай, түүхэн авиралтуудын нэг болж бүртгэгдэж байна.
Өмнө нь Францын авирагч Ален Робер 2004 онд “Taipei 101”-ийг олс ашиглан авирч байсан бол, Хоннолд нь ямар ч хамгаалалтгүйгээр уг барилга дээр гарсан анхны хүн болжээ.
“Taipei 101” барилга нь 2004–2010 оны хооронд дэлхийн хамгийн өндөр барилга байсан бөгөөд өнөөдөр ч Тайванийн инженерчлэл, орчин үеийн хотжилтын бэлгэ тэмдэг хэвээр байна.
Эх сурвалж: Chosun.com
