Владимир Путин 2026 оны 3-р сарын эхээр хийсэн мэдэгдэлдээ ОХУ Европын орнуудад газрын тос болон байгалийн хий нийлүүлэхэд бэлэн хэвээр байгаа ч үүний тулд Европын тал хамтын ажиллагаанд сонирхолтой байгаагаа илэрхийлэх шаардлагатай гэж мэдэгджээ. Хэрэв талууд тохиролцвол урт хугацааны улс төрөөс ангид эрчим хүчний хамтын ажиллагаа сэргээх боломж нээлттэй гэж Кремлийн тал онцолсон байна.
ОХУ нь дэлхийн хамгийн том байгалийн хийн нөөцтэй орнуудын нэг бөгөөд Европын зах зээлд өмнө нь гол нийлүүлэгч байсан. Гэвч 2022 оны Украйнд хийсэн довтолгооны дараа Европын холбоо Оросын хийн хараат байдлыг бууруулах бодлого баримталж, импортыг үе шаттайгаар зогсоож байгаа юм.
Сүүлийн жилүүдэд Европын олон улс АНУ, Норвеги, Катар зэрэг эх үүсвэрээс авах хийн хэмжээг нэмэгдүүлсэн ч зарим төв болон зүүн Европын орнууд Оросын хийг үргэлжлүүлэн ашиглаж байгаа хэвээр байна. Одоогийн байдлаар Оросоос Европ руу хүрдэг гол хоолой нь Хар тэнгисээр дамждаг TurkStream хоолой бөгөөд Балкан болон төв Европын зарим улс энэ шугамаар хий авч байна.
Шинжээчдийн үзэж буйгаар Ойрх Дорнодын мөргөлдөөнөөс шалтгаалан дэлхийн эрчим хүчний үнэ өсөж байгаа нь ОХУ-д тодорхой хэмжээнд ашигтай нөхцөл үүсгэж байгаа бөгөөд Москва Европын зах зээлд дахин нэвтрэх сонирхлоо ийнхүү илэрхийлж эхэлсэн байна.
ОХУ Европт хий нийлүүлэхэд бэлэн гэдгээ илэрхийлсэн ч бодит нийлүүлэлт сэргэх эсэх нь улс төрийн харилцаа, хориг арга хэмжээ, Европын эрчим хүчний бодлогоос ихээхэн хамаарах юм.
Орост мөнгө хэрэгтэй, Европт хий хэрэгтэй. Үйл явдал цаашид хэрхэн үргэлжлэхийг харах л үлдлээ.
Эх сурвалж: Reuters, Xinhua
Hashtag: #Russia #Gas #Europe #Energy #Putin #Geopolitics #WorldNews #ShortlyMN
