Япон улс дэлхийн эрчим хүчний зах зээлд үүссэн хямралын улмаас стратегийн нефтийн нөөцөөсөө тодорхой хэсгийг гаргахаар шийдвэрлэсэн гэж Японы Ерөнхий сайд Санаэ Такаичи мэдэгдлээ. Энэ нь Ойрх Дорнод дахь мөргөлдөөн, ялангуяа Хормузын хоолойгоор дамжих нефтийн тээвэрт үүссэн хямралаас шалтгаалан дэлхийн зах зээлд үнэ огцом савлаж эхэлсэнтэй холбоотой юм.
Япон улс эхний ээлжид хувийн компаниудын хадгалж буй нөөцөөс 15 хоногийн хэрэглээтэй тэнцэх хэмжээний нефть, дараа нь төрийн стратегийн нөөцөөс 30 хоногийн хэрэглээтэй тэнцэх хэмжээний нефть гаргахаар төлөвлөжээ. Ингэснээр нийтдээ 45 хоногийн хэрэглээг хангах хэмжээний нефть зах зээлд нийлүүлэх юм.
Япон өдөрт дунджаар 3.2-3.5 сая баррель нефть хэрэглэдэг бөгөөд энэ тооцоогоор стратегийн нөөцөөс ойролцоогоор 140-150 сая баррель нефть гаргах боломжтой гэж шинжээчид үзэж байна. Гаргасан нефтийг дотоодын цахилгаан станц, нефть боловсруулах үйлдвэрүүд болон тээврийн хэрэгслийн түлшний зах зээлд нийлүүлж, эрчим хүчний тасалдлаас сэргийлэх, үнийн огцом өсөлтийг тогтворжуулах зорилготой аж.
Япон нь дэлхийн хамгийн том стратегийн нефтийн нөөцтэй орнуудын нэг бөгөөд нийт нөөц нь тус улсын 270 орчим хоногийн хэрэглээг хангах хэмжээтэй байдаг.
Энэхүү шийдвэр нь Олон улсын эрчим хүчний агентлагийн зохион байгуулж буй дэлхийн стратегийн нөөцөөс 400 сая баррель нефть гаргах олон улсын ажиллагааны нэг хэсэг юм. Шинжээчдийн үзэж буйгаар Ойрх Дорнод дахь мөргөлдөөнөөс үүдсэн нийлүүлэлтийн хямрал нь дэлхийн нефтийн зах зээлд сүүлийн хэдэн арван жилд байгаагүй хамгийн том цохилтыг өгнө гэж дүгнэж байна.
Эх сурвалж: Reuters
#Япон #Нефть #ЭрчимХүч #НефтийнХямрал #ОйрхДорнод #ХормузынХоолой #ДэлхийнМэдээ #ЭдийнЗасаг #ShortlyMN #Japan #Oil #EnergyCrisis #IranWar #OilMarket #WorldNews #ShortlyMN
