БНХАУ 2026 оны 5 дугаар сарын 1-ний өдрөөс эхлэн дипломат харилцаатай Африкийн 53 улсын Хятад улс руу экспортлох бараанд 0 хувийн тариф буюу татвар тооцохгүй байх бодлогыг хэрэгжүүлэхээр боллоо. Энэ нь өмнө нь зөвхөн хамгийн буурай хөгжилтэй 33 улсад олгож байсан хөнгөлөлт бөгөөд үүнийгээ бүх Африк даяар тэлж буй том алхам болж байна.
БНХАУ-ын Төрийн Зөвлөлийн Гаалийн Тарифын Хорооны мэдэгдсэнээр, 2026 оны 5 дугаар сарын 1-нээс 2028 оны 4 дүгээр сарын 30-ны өдөр хүртэлх хугацаанд энэхүү тарифын бодлого үргэлжлэх бөгөөд талууд харилцан тохиролцож цаашид сунгах боломжтой гэж мэдээлсэн байна.
Тус бодлогоор Хятад улс нь дипломат харилцаатай бүх Африкийн орон болон бүх хамгийн буурай хөгжилтэй орнуудад нэг талын тэг тариф тогтоосон анхны томоохон эдийн засагт тооцогдох болж байна. Тарифын квотод багтсан бүтээгдэхүүний хувьд 0 татвар төлөх бол квотоос гадуурх тарифыг хэвээр үлдээсэн байна.
Хятадын ГХЯ-ны хэвлэлийн төлөөлөгч Лин Жянь энэ бодлого нь Африкийн чанартай бүтээгдэхүүнийг Хятадын өрхүүдэд хүргэж, Африкт Хятадын хөрөнгө оруулалт болон үйлдвэрлэл, шинэчлэлийн олон талын боломжийг бий болгоно гэж мэдэгдэв.
Дэлхий нийтэд дотоодын зах зээлээ хамгаалах үүднээс тариф тогтоодог бол Хятадын энэхүү алхам нь Африкийн аж үйлдвэржилт болон Хятад-Африкийн худалдаа, хөрөнгө оруулалтын хамтын ажиллагааг шинэ шатанд гаргана гэж олон улсын шинжээчид үзэж байна.
Эх сурвалж: Xinhua, China Daily
#ШортлиТойм #ХятадАфрик #ТэгТариф #Худалдаа #ОлонУлс #China #Africa #ZeroTariff #Trade
