Хятадын нүүрсний уурхайн осол 82 хүний аминд хүрэв. Юу болсон бэ? Эдийн засагт хэрхэн нөлөөлөх вэ?
Сүүлийн 17 жилд Хятадад гарсан хамгийн том уурхайн осол — Шаньси мужийн Люшэньюй нүүрсний уурхай
2026 оны 5 дугаар сарын 22-ны оройн 19:29 цагт Хятадын Шаньси мужийн Чанжи хотын Циньюань дүүрэгт байрлах Люшэньюй нүүрсний уурхайд хийн дэлбэрэлт болж, хамгийн сүүлийн албан ёсны мэдээгээр 82 хүн нас барж, 128 хүн гэмтэж эмнэлэгт хүргэгджээ.
Юу болсон бэ?
Албаны мэдээллээр осол гарахаас өмнө буюу 5 дугаар сарын 22-ны орой уурхайн газар доорх нүүрстөрөгчийн дутуу исэл (CO)-ийн мэдрэгч хэмжээ хэтэрсэн дохио дуугарсан байна. Удалгүй хүчтэй дэлбэрэлт болсон бөгөөд тэр үед газар доор 247 ажилтан ажиллаж байсан байна.
Эмнэлэгт хүргэгдсэн уурхайчдын нэг хүхэр, шатамхай хийн үнэр, утаа мэдэрсэн тухайгаа CCTV-д ярьжээ. Анхны мэдээллээр 8 хүн нас барсан гэж байсан бол маргааш нь тоо 90 болж өссөн, харин дараа нь нягтлан шалгахад 82 болж буурсан байна. Шаньси мужийн эрх баригчид ослын дараах нөхцөл байдлыг эмх замбараагүй мэдээлсэн нь тоо баримт зөрөх шалтгаан боллоо.
Шалтгаан, хариуцлага
Уурхайг “Shanxi Tongzhou Coal Coking Group” эзэмшдэг бөгөөд жилдээ 1.2 сая тонн нүүрс олборлох хүчин чадалтай. Энэ уурхай 2024 онд Хятадын Үндэсний уурхайн аюулгүй байдлын газрын “өндөр хийн агууламжтай, гамшгийн эрсдэлтэй” уурхайн жагсаалтад орж байжээ.
Уурхайн зүгээс өгсөн зураг төсөл бодит малтлагатай таарахгүй байсан нь аврах ажиллагааг ноцтойгоор хүндрүүлсэн гэж төрийн мэдээллийн хэрэгсэл онцолжээ. Ослын дараа компанийн удирдлагуудыг саатуулж, тус группийн дөрвөн уурхайг бүгдийг хаасан байна. Хятадын дарга Ши Жиньпин бүх боломжит хүчээ дайчлан аврах ажиллагаа явуулж, хуулийн дагуу нарийвчилсан мөрдөн шалгалт хийхийг тушаасан байна.
Эдийн засагт хэрхэн нөлөөлөх вэ?
Хятадын дотоодын нүүрсний нийлүүлэлт түр хугацаанд саарч, үнэ өсвөл импортын нүүрсний эрэлт нэмэгдэх нь тодорхой юм. Энэ нь Монголын нүүрс экспортлогчдод (ялангуяа коксжих нүүрс) богино хугацаад эерэг нөлөө үзүүлэх магадлалтай юм. Гэхдээ хэр удаан үргэлжлэх вэ гэдэг нь Хятадын шалгалтын цар хүрээ, үргэлжлэх хугацаанаас шалтгаална.
Энэхүү осол нь дэлхийн хамгийн том нүүрс олборлогч, үйлдвэрлэгч Хятадын хувьд уурхайн аюулгүй ажиллагаа, хяналтыг сайжруулах “хөгжлийг аюулгүй байдлаас түрүүлж тавих” асуудлыг дахин хурцаар ил гаргалаа. Хятадын олон хэвлэл мэдээллийн хэрэгслээр уг ослыг шүүмжилсэн нийтлэл нийтэлж, уурхайн үйлдвэрлэлийн аюулгүй байдалд илүү анхаарал хандуулахыг уриалжээ.
