Антарктидын бэлгэ тэмдэг болсон Эзэн хаан пингвин (Emperor penguin)-ны төрөл зүйл нь Олон улсын байгаль хамгаалах холбоо (IUCN)-ны улаан жагсаалтад “устах аюултай” (Vulnerable) ангилалд албан ёсоор шилжлээ. Энэ нь уг төрөл зүйлийн ирээдүйд бодит эрсдэл үүссэнийг илтгэж байна.
Дэлхийн уур амьсгалын өөрчлөлтийн нөлөөгөөр Антарктидын тэнгисийн мөс жилээс жилд багасаж байгаа бөгөөд судлаачид 2080 он гэхэд Emperor penguin-ийн тоо толгой 50 хувиас дээш хэмжээгээр буурч болзошгүй гэж анхааруулж байна.
Эзэн хаан пингвин нь дэлхийн хамгийн том пингвин бөгөөд 120 см хүртэл өндөр, 45кг жинтэй болдог. Одоогоор 250,000 орчим үржлийн хос, 500,000 орчим бодгаль үлдсэн гэж тооцогддог ба жилд ердөө нэг өндөг гаргадаг нь тэднийг эмзэг болгодог.
Энэ зүйл нь амьдралынхаа ихэнх хугацааг (жилд 9 сар хүртэл) тогтвортой мөсөн дээр өнгөрүүлдэг. Хослох, өндөглөх, дэгдээхэйгээ өсгөх, үсээ хаях, шинэчлэх бүх үйл явц нь мөсөн орчноос шууд хамааралтай. Дэгдээхэйн амьд үлдэх нь далайн мөсний тогтвортой байдлаас шууд хамаардаг байна. Гэвч 2016 оноос хойш Антарктидын тэнгисийн мөсний хэмжээ огцом буурч, зарим хэсэг бүрэн нуран унах эрсдэлд хүрээд байна.
Хиймэл дагуулын мэдээгээр авсан зарим судалгаануудад тус бүсэд олон мянган насанд хүрсэн пингвин богино хугацаанд устсан болохыг батлан харуулж байгаа бөгөөд энэ нь уур амьсгалын өөрчлөлт бодитоор нөлөөлж эхэлснийг илтгэнэ.
Ирэх сард Япон улсад зохион байгуулагдах Антарктидын гэрээний зөвлөлдөх уулзалтаар Emperor penguin-ийг “тусгай хамгаалалттай зүйл”-д оруулах асуудлыг дахин хэлэлцэхээр төлөвлөж байна.
Антарктидын мөс хайлсаар байгаа нь зөвхөн нэг амьтны мөхөл биш, дэлхийн уур амьсгалын систем бүхэлдээ өөрчлөгдөж байгаагийн тод дохио болж байна.
Эх сурвалж: IUCN
#ClimateChange #EmperorPenguin #IUCN #Antarctica #Байгаль #УурАмьсгалынӨөрчлөлт #Shortlymn
