Унгар улсад парламентын сонгууль явагдаж сөрөг хүчин ялснаар хоёр сарын турш тавиад байсан хоригоо цуцалж улмаар Европын холбоо Украйнд 2026-2027 онд зориулсан 90 тэрбум еврогийн (ойролцоогоор 106 тэрбум ам.доллар) томоохон зээлийн багцыг эцсийн байдлаар баталлаа.
Энэхүү шийдвэрийг Европын Холбооны Зөвлөл 2026 оны 4 дүгээр сарын 23-ны өдөр баталсан бөгөөд анхны төлбөр аль болох хурдан Киевт хүрнэ гэж Брюссель мэдэгдлээ.
Зээлийн 60 тэрбум евро нь Украйны батлан хамгаалахын аж үйлдвэрийн чадавхыг бэхжүүлэх, зэвсэг хэрэгсэл худалдан авахад, үлдсэн 30 тэрбум евро нь макро санхүүгийн дэмжлэг, улсын төсвийн дутагдлыг хангахад зарцуулагдана. Цэргийн зориулалттай хэсэгт Европт үйлдвэрлэсэн зэвсэг, техник худалдан авах гэсэн шаардлага тавигдаж, санхүүжилтийн дийлэнх хувь нь Европын үйлдвэрлэгчдэд орохоор болсон байна.
Энэ зээлээс 2026 онд нийт 45 тэрбум евро үе шаттайгаар шилжих ба 16.7 тэрбум евро нь санхүүгийн дэмжлэг, 28.3 тэрбум евро нь цэргийн дэмжлэгт зориулагдана. Үлдсэн 45 тэрбум евро 2027 онд олгогдох төлөвтэй байна. Санхүүжилт нь авлигатай тэмцэх, хууль дээдлэх зарчмыг баримтлах зэрэг нөхцөлд захирагдана гэдгийг онцолжээ.
Унгарын Ерөнхий сайд Виктор Орбан 2 дугаар сард тус зээлд хориг тавьсан учир шалтгаан нь Унгар, Словакт оросын газрын тос нийлүүлдэг Дружба хоолой Орос улсын дроны цохилтоор эвдэрсэнтэй холбоотой байсан. Унгарт 2026 оны 4 дүгээр сарын 12-ны өдөр явагдсан сонгуулиар ялагдсан Орбан хоолой сэргээгдсэний дараа амласан ёсоороо хоригоо цуцаллаа. Уг хоолойгоор газрын тосны нийлүүлэлт 4 дүгээр сарын 23-нд бараг гурван сарын дараа дахин дамжиж эхэллээ.
Украйны Ерөнхийлөгч Влодимир Зеленский батлагдсан зээлийн анхны шилжүүлгийг энэ оны 5-6 сард хүлээн авна гэж мэдэгдсэн байна. Украйн уг зээлийг зөвхөн Орос улс дайны нөхөн төлбөрөө төлж эхэлсэн тохиолдолд буцаан төлөх үүрэг хүлээж байгаа нь бараг эргэн төлөгдөх нөхцөлгүй гэсэн үг юм.
Түүнчлэн Европын Холбоо мөн өдөр Орос улсын эсрэг шинэ багц хориг арга хэмжээг баталсан бөгөөд 40 гаруй флотын хөлөг онгоц, хэд хэдэн банк, 60 байгууллагыг хориг арга хэмжээний жагсаалтад мөн нэмсэн байна.
Энэхүү зээл батлагдсанаар Украйны эдийн засаг ирэх хоёр жилийн турш тогтвортой ажиллах санхүүгийн суурь бий болж, Орост дипломат болон цэргийн дарамт үзүүлэх Европын байр суурь улам бэхжиж байна.
Орос-Украйны дайн сунжрах уу? Цаашид үйл явдал хэрхэн өрнөх бол?
Эх сурвалж: Consilium EU Council, Euronews, Bloomberg, CNN #Украйн #ЕвропынХолбоо #Орос #Унгар #Зээл #Геополитик #Ukraine #EU #Russia #Hungary #Loan #Geopolitics #Shortly #Шортлимн
