Дэлхийн агаарын тээврийн салбар нислэгийн үеийн интернэт холболтын шинэ эрин рүү эрчимтэй шилжиж байна. Технологийн энэ өөрчлөлтийн гол түлхүүр нь Starlink юм. Өндөр хурдтай, тогтвортой интернэт холболт санал болгодог энэхүү хиймэл дагуулын системийг Qatar Airways, Lufthansa зэрэг дэлхийн тэргүүлэх авиа компаниуд агаарын хөлгүүддээ бүрэн нэвтрүүлэхээ идэвхтэй зарлаад байна. Ингэснээр зорчигчид нислэгийн турш үнэгүй Wi-Fi ашиглах, ажлаа хийх, стрийминг үзэх, бодит цагийн холбоонд байх боломж бүрдэх юм.
Гэвч энэхүү дэвшилтэт технологи бүх компанийн хувьд таатай шийдэл биш байна. Европын хамгийн том хямд өртөгт тээвэрлэгч Ryanair Starlink-ийг нэвтрүүлэхээс эрс татгалзаж, үүний эсрэг тод байр суурь илэрхийлэв. Компанийн гүйцэтгэх захирал Майкал O’Леари-гийн тайлбарласнаар, Starlink-ийн антеныг агаарын хөлгийн их биед суурилуулах нь агаарын эсэргүүцлийг нэмэгдүүлж, шатахууны хэрэглээг ойролцоогоор 2 хувиар өсгөх бөгөөд энэ нь эцсийн дүндээ тасалбарын үнэ нэмэгдэх эрсдэлтэй гэнэ. Ryanair-ийн философи энгийн зорчигчдод хамгийн хямд үнэтэй нислэг санал болгох явдал нь Wi-Fi-аас хавьгүй чухал хэрэг гэж үзэж байна.
Энэхүү байр суурь нь Элон Масктай олон нийтийн сүлжээнд ил тод маргаан үүсгэхэд хүргэж, тэдний хоорондын үгийн зөрчил олон сая хандалт авч, цахим орчны халуун сэдэв боллоо. Маск ирээдүйн нислэгийг интернэтгүйгээр төсөөлөхийн аргагүй гэж үзэж буй бол О’Леари зорчигчид Wi-Fi-аас илүү хямд үнийг сонгодог хэмээн эсрэгцүүлж байна. Энэ нь агаарын тээврийн салбарын хоёр өөр бизнес философи тав тух ба дээд зэрэглэлийг эрхэмлэх үү, эсвэл зардлыг барьж, хамгийн хямд үнийг санал болгох уу гэсэн үндсэн зөрчлийг тод харуулж байна.
Ирээдүйд агаарын тээврийн зах зээл улам хоёр туйлд хуваагдах төлөвтэй. Нэг талд нь Qatar Airways, Lufthansa шиг зорчигчийн тав тухад төвлөрсөн, Wi-Fi-г стандарт үйлчилгээ болгох premium брэндүүд, нөгөө талд нь Ryanair шиг хэт зардал хэмнэлтэд суурилсан, ямар ч нэмэлтгүй хямд нислэг санал болгодог low cost загвар хүчтэй өрсөлдөнө. Эцсийн сонголтыг харин зорчигчид өөрсдөө хийнэ. Таны нислэгт интернэт чухал уу? эсвэл хямд тасалбар илүү чухал уу?
Эх сурвалж: X
