АНУ-ын Хүнс, эмийн газар (FDA) Eli Lilly компанийн шинэ жин хасах эм болох Foundayo-г албан ёсоор зөвшөөрлөө.
Энэхүү шийдвэр нь ердөө 50 хоногт гарсан бөгөөд 2002 оноос хойш олгосон шинэ төрлийн эмийн хамгийн хурдан зөвшөөрөл болжээ.
Foundayo нь өдөрт нэг удаа уудаг GLP-1 төрлийн эм бөгөөд таргалалт болон жинтэй холбоотой эрүүл мэндийн асуудалтай насанд хүрэгчдэд зориулагдсан.
Өмнө нь зөвхөн тарилгын хэлбэрээр байсан GLP-1 эмүүд одоо шахмал эм хэлбэрт шилжиж байна.
Foundayo зургаан өөр тунтайгаар худалдаанд гарах бөгөөд хоол ундаа хязгаарлалтгүйгээр өдрийн аль ч цагт уух боломжтой нь Novo Nordisk компанийн Wegovy эмээс ялгарах гол давуу тал болжээ.
Клиникийн туршилтад оролцогчид хамгийн өндөр тунг 72 долоо хоног хэрэглэснийхээ дараа дунджаар биеийн жингийнхээ 12.4%-ийг буюу ойролцоогоор 11-12 кг хасжээ.
Үнийн хувьд АНУ-ын зах зээлд даатгалтай хэрэглэгчид сард ердөө 25 доллар төлж авах бол даатгалгүй хүмүүс сард 149-299 доллар төлөх төлөвтэй байна.
Эм 2026 оны 4-р сарын 6-наас LillyDirect платформоор хүргэлтэд гарч, удалгүй жижиглэнгийн эмийн сангуудад нийлүүлэгдэх юм байна.
Foundayo нь жин хасахаас гадна цусны даралт, холестерол, триглицерид зэрэг зүрх судасны эрсдэлийн олон үзүүлэлтийг сайжруулдаг нь туршилтаар нотлогдсон байна.
Зарим уламжлалт чиг хандлагатай эмч нарын зүгээс хүний жинг эрүүл хооллож, хөдөлгөөн, биеийн тамир хийж хасах ёстой болохоос эм ууж хасах нь эрүүл мэндэд хортой гэж дүгнэж байна.
Харин эмийн компанийн зүгээс хөдөлгөөн хязгаарласан, эрүүл мэндийн шалтгаантай хүмүүсийн хувьд энэхүү эм нь маш чухал ач холбогдолтой юм гэдгийг онцолсон байна.
Эх сурвалж: Lilly
#Foundayo #ЖинХасах #GLP1 #EliLilly #FDA #Эрүүл мэнд #ShortlyМН
