Энэтхэг улс Үндсэн хуулиа баталсны 77 жилийн ойг тохиолдуулан нийслэл Шинэ Дели хотын Kartavya Path өргөн чөлөөнд сүр жавхлант цэргийн болон соёлын парад зохион байгууллаа.
Тус арга хэмжээг Энэтхэг улсын Ерөнхийлөгч, эрхэм хатагтай Драупади Мурму нээж, үндэсний далбаагаа мандуулсан бөгөөд 21 удаагийн ёслолын буудлага хийснээр албан ёсоор эхлүүлсэн байна.
Энэ жилийн парад нь Энэтхэгийн батлан хамгаалах чадавх, орчин үеийн технологийн дэвшил, олон үндэстний соёл, эдийн засаг, нийгмийн хөгжлийн ололтыг цогцоор нь харуулснаараа онцлог байв. Мөн Европын Холбооны Комиссын Ерөнхийлөгч Урсула Фон Дер Ляйен зэрэг нэр хүндтэй гадаадын хүндэт зочид оролцсон нь олон улсын анхаарлыг татаж байна.
Түүнчлэн технологийн аварга компани Google тус баярт зориулан Энэтхэгийн сансар судлалын ололтыг онцолсон тусгай doodle танилцуулж, баярын уур амьсгалыг дэлхий нийтэд түгээжээ.
Энэтхэг улс 1947 онд Их Британийн колоничлолын дэглэмээс тусгаар тогтнолоо олж, улмаар 1950 оны 1 дүгээр сарын 26-нд Үндсэн хуулиа баталж, Бүгд Найрамдах засаглалд шилжсэн түүхтэй. Иймд энэ өдөр нь тус улсын хувьд эрх чөлөө, ардчилал, үндэсний бахархлын бэлгэдэл өдөр болон тэмдэглэгддэг байна.
Монгол Улс, Бүгд Найрамдах Энэтхэг Улс нь 1955 онд дипломат харилцаа тогтоосон уламжлалт найрсаг харилцаатай түншүүд юм. Сүүлийн жилүүдэд хоёр улсын хамтын ажиллагаа эрчимжиж, Энэтхэг улсын Засгийн газраас манай улсад нефть боловсруулах үйлдвэр барих томоохон төсөл хэрэгжүүлж байгаа нь харилцааны тод илэрхийлэл болж байна.
Эх сурвалж: The Times of India
