Ираны Гадаад хэргийн сайд Аббас Арагчи ОХУ-ын Санкт-Петербург хотод Путинтэй уулзаж, Орос-Ираны стратегийн түншлэлийг бататгав.
Ираны Гадаад хэргийн сайд Аббас Арагчи 2026 оны 4 дүгээр сарын 27-ны өдөр Орос Улсын Санкт-Петербург хотноо айлчилж, Ерөнхийлөгч Владимир Путинтэй уулзлаа. Энэ айлчлал нь АНУ-Иран хоёрын хооронд түр хугацаанд гал зогссон, яриа хэлэлцээрийн үед хийгдэж байгаагаараа онцлог болж байна.
Уулзалтын үеэр Ираны тал Орос-Ираны стратегийн харилцааны ач холбогдлыг тодотгож, Тегеран нь олон улсын тавцанд Орос улсаас улс төрийн дэмжлэг, дипломат хөшүүрэг хайж байгаагаа илэрхийлэв.
Үүний хариуд ОХУ-ын ерөнхийлөгч Путин өнгөрсөн долоо хоногт Ираны шинэ Дээд Удирдагчаас албан ёсны илгээлт хүлээж авсан тухайгаа мэдэгдэж Ираны талыг тууштай дэмжиж буйгаа илэрхийлжээ. Ираны Шинэ Дээд Удирдагч нь өмнөх Удирдагчийн залгамжлагчаар томилогдсоноосоо хойш олны өмнө ил гараагүй байгаа бөгөөд Путин түүнтэй харилцаа холбоо тогтоосон цөөн гадаадын удирдагчдын нэг болж байна.
Шинжээчид Ираны энэхүү дипломат алхмыг АНУ-тай хийж буй хэлэлцээрт өөрийн байр сууриа бэхжүүлэх, Хормузын хоолой болон цөмийн хөтөлбөрийн асуудлаар хөшүүрэг бий болгох оролдлого гэж дүгнэж байна. Оросын тал ч Ойрх Дорнодын зөрчилд нөлөөгөө сэргээх боломжийг ашиглах нь тодорхой байна.
АНУ-Иран хоёр Пакистанд хийсэн анхны хэлэлцээрийн дараа хоёр дахь шатны уулзалтаа хойшлуулсан үед Москва-Тегераны харилцаа улам бүр гүнзгийрч байгаа нь Ойрх Дорнод дахь геополитикийн шинэ тэнцвэр үүсэхийг харуулж байна.
Эх сурвалж: CNN
#Иран #Орос #Путин #Арагчи #ОйрхДорнод #Шортлимн #Дипломат #Shortlymn #Russia #Iran #Putin
