Пакистаны нийслэл Исламабадад 2026 оны 4 дүгээр сарын 11-нд болсон хэлэлцээр үр дүнд хүрээгүйн улмаас Ойрх Дорнод дахь нөхцөл байдал илүү дордож байна. Энэ нь АНУ, Иран улсууд нэг нэгэндээ бууж өгөх бодолгүй байгаагийн дохио боллоо.
АНУ дэлхийн хамгийн хүчирхэг тэнгисийн цэрэгтэй гэдэг боловч Хормузын хоолой нь түүнд тохиромжгүй тулааны орчин нөхцөл юм. Харин Иран энэ бүсэд “тэгш бус дайн” буюу asymmetric warfare стратегиар тодорхой давуу тал үүсгээд байна.
АНУ-ын тэнгисийн флот нисэх хүчин, өндөр нарийвчлалтай пуужингийн системээр дэлхийд тэргүүлдэг ч Хормузын хоолойн нарийхан, гүехэн усанд том хөлгүүдийн маневр хязгаарлагддаг бөгөөд энэ нь Ираны хувьд байгалийн “давуу тал” болж өгдөг.
Иран шууд тулалдахаас зайлсхийж, хурдан жижиг завь, далайн мина, эрэгт суурилсан пуужин, дроноор дайсныг залхааж, зардлыг нь өсгөх стратеги баримталж байна. Жишээлбэл, АНУ-ын нэг пуужин дунджаар 2 сая ам.долларын өртөгтэй бол Ираны зарим дрон 20,000 ам.долларын орчим үнэтэй байдаг нь зардлын зөрүү, дайны төлбөрийг илэрхийлж байна.
Исламын хувьсгалт харуул эрэгт ойр байрлалтай тул хариу үйлдэл хурдан үзүүлэх боломжтой. Мөн мина цэвэрлэх ажиллагаа удаан, эрсдэл өндөртэй байдаг нь АНУ-ын давшилтыг сааруулах хүчин зүйл болдоод байна.
Цэргийн хүчин чадлаар АНУ илт давуу ч улс төр, эдийн засгийн зардал өндөр хэвээр. Газрын цэрэг оруулах тохиолдолд Ирак, Афганистантай төстэй урт хугацааны хямрал үүсэх эрсдэлтэй. Иргэний хохирол нэмэгдэх тусам олон улсын эсэргүүцэл болон АНУ-ын дотоод дарамт өснө.
Иймээс АНУ шууд мөргөлдөөнөөс зайлсхийж, эдийн засгийн дарамт, бүслэн авах стратегиар Иранд нөлөөлөхийг зорьж байна.
Энэ хурцадмал байдал дэлхийн зах зээлд шууд нөлөөлж, Брент газрын тосны үнэ баррель тутамд 70 ам.доллароос 100 ам.долларыг давсан байна.
Эх сурвалж: CBS News, CNN, NPR, Wikipedia #ХормузынХоолой #АНУИран #ТэнгисийнЦэрэг #HormuzStrait #IranWar #USMilitary #Shortly
